Што для вас Радзіма? Адказы відавочны: гэта тое, што назаўсёды ў сэрцы, дзе б ты ні быў, куды б ні закінуў цябе лёс…
А калі б вас запыталі, што такое Малая Радзіма? Канешне ж, гэта тыя мясціны, той непаўторны куток, дзе нарадзіліся менавіта вы..
А для вучняў НПК “Яслі-сад-сярэдняя школа №44 г. Магілёва” Малая Радзіма - гэта яшчэ і незабыўныя, цікавыя, а часам, і чароўныя звычаі той мясцінкі, дзе жылі продкі.
Традыцыі можна і трэба паважаць, захоўваць і працягваць. Але нашы вучні пайшлі далей: у гэтым годзе мы вырашылі пакласці пачатак новым традыцыям і зладзіць свае асабістыя БАРОЎСКІЯ ДАЖЫНКІ!
Якая багатая была гэта восень на ўраджай! І ўсё гэтае незлічонае багацце трапіла не толькі на стол, але і з’явілася прыстасаваннем для ўсялякіх гульняў і конкурсаў. Дзеці спаборнічалі ў хуткасным катанні гарбузоў, зрабілі інсцэніроўку казкі ”Рэпка”, і канешне ж, не забыліся пра народныя беларускія танцы і спевы. Не засталіся ў баку і бацькі вучняў. Разам з дзецьмі, забыўшыся пра свой ўзрост, яны пускаліся ў скокі, лічылі восеньскія падарункі прыроды і адгадвалі загадкі.
Свята прайшло так займальна і весела, што на прыканцы агульным рашэннем было: “Бароўскім дажынкам” штогод – быць!
Наталля Рыжанкова, настаўнік пачатковых класаў
ДУА “Навучальна-педагагічны комплекс
яслі-сад-сярэдняя школа №44 г. Магілева”
|