У дзяржаўнай установе адукацыі “Яслі-сад № 13 г. Магілёва” ужо традыцыйным стала правядзенне тыдня беларускіх традыцый. Вось і сёлета распачалі сваю дзейнасць тэматычныя вечары для нашых выхаванцаў і іх бацькоў, каб перагарнуць старонкі Кнігі Беларусі, паслухаць беларускую музыку і песні, паразмаўляць аб гісторыі, культуры і традыцыях нашай краіны.
Кожны дзень нашых дзяцей і дарослых чакалі цікавыя сустрэчы, святы і забавы на тэмы “Песні спяваем, вясну гукаем”, “Пагуляем разам у беларускія гульні”, “Стравы беларускія”, “Мая Радзіма- Беларусь”. Дзеці на роднай мове чыталі вершы пра Радзіму, дзяліліся з дарослымі сваімі ўяўленнямі, ведамі аб тым, чым славіцца наша краіна ва ўсім свеце.
Разам з музычным кіраўніком Ермалаевай С.Ў. дзеці і дарослыя слухалі і спявалі святочныя веснавыя песні, рыхтаваліся да масленіцы, з выхавальнікам Гусаковай Т.П. ператвараліся ў сапраўдных майстроў-ганчароў: ляпілі і распісвалі беларускі посуд, з кіраўніком фізічнага выхавання Такмянінавай В.І. весела правялі час, гуляючы ў беларускія гульні. Намеснік загадчыка па асноўнай дзейнасці Быкава І.Ў. запрасіла на сустрэчу, прысвечанаю беларускай традыцыі - дабразычліва прымаць гасцей, частаваць іх стравамі з беларускай кухні.
Бацькі і педагогі пастараліся: прыгатавалі дранікі, аладкі, мачанку, галушкі, бліны і г.д. Дарослыя і дзеці спаборнічалі ў ведах аб беларускіх стравах, расказвалі прыказкі і прымаўкі аб працы і сяброўстве, частаваліся, слухалі беларускія песні. Настрой ва ўсіх быў цудоўны - адбылося спараўднае свята.
Вольны час, праведзены разам, дапамог не толькі ўспомніць пра беларускія традыцыі, але і дапамог аб’яднаць дзяцей і бацькоў агульнай дзейнасцю, садзейнічаў стварэнню спрыяльных умоў для выяўлення і раскрыцця іх творчага патэнцыялу, даў магчымасць удзельнікам для самавыяўлення і самарэалізацыі.
Загадчык яслей-сада Людміла Музычэнка
|