Незвычайна цікава ў гэтым годзе прайшоў тыдзень славеснасці ў ДУА «Сярэдняя школа № 20 г.Магілева». Асаблівую цікавасць праявілі вучні да Дня роднай мовы.
У гэты дзень была праведзена акцыя «Гаворым па-беларуску». Раніцай вучняў і настаўнікаў школы сустракалі вучні ў нацыянальных касцюмах і прапаноўвалі ўсім стаць удзельнікамі гэтай акцыі.

На вялікім перапынку вучняў чакаў займальны конкурс «Спяваем разам!» Удзельнікам трэба было спачатку пазнаць мелодыю папулярнай дзіцячай песні, а потым праспяваць яе па-беларуску. Разам спявалі такія вядомыя песні, як «Спяць натомленыя цацкі», «Ялінка», «Песенька Чарапахі і Ільвяня» і інш.

Потым былі адкрыты выставы малюнкаў да твораў мастацкай літаратуры і фотаздымкаў «Мой родны кут».
Пасля ўрокаў у актавай зале сустрэліся каманды 9 — 11 класаў на інтэлектуальнай гульні «Славутыя імёны Бацькаўшчыны». Вучні адказвалі на пытанні, звязаныя з гісторыяй і літаратурай, выконвалі творчыя заданні, спрабавалі сябе ў ролі артыстаў і мастакоў. Перамагла каманда «Асвета» вучняў 9 класаў.

Удзельнікі ўсіх конкурсаў атрымалі ўзнагароды.
Спадзяёмся, што і ў наступным годзе Дзень роднай мовы пройдзе таксама цікава, будзе запамінальным, а вучні будуць яшчэ больш актыўнымі ўдзельнікамі ўсіх мерапрыемстваў.

Кіраўнік МА настаўнікаў беларускай і рускай мовы і літаратуры Трэушэнка І.А.