Святкаванню 70-годдзя Перамогі савецкага народа ў Вялікай Айчыннай вайне і памяці знакамітага ўраджэнца Магілёўшчыны, заслужанага работніка культуры БССР, лаўрэата Дзяржаўнай прэміі БССР імя Янкі Купалы, паэта-франтавіка Аляксея Васільевіча Пысіна быў прысвечаны літаратурны конкурс «У нашай памяці жыве», які з 1 лютага па 15 сакавіка 2015 года праводзілі Магілёўская абласная бібліятэка імя У. І. Леніна і Магілёўскае абласное аддзяленне грамадскага аб’яднання «Саюз пісьменнікаў Беларусі».
Конкурс дазволіў прыцягнуць увагу маладых літаратараў да падзей Вялікай Айчыннай вайны, да жыцця і творчасці паэта-франтавіка А.В. Пысіна, спрыяў фарміраванню ў юнакоў і дзяўчат патрыятычнай свядомасці, пачуцця вернасці Айчыне, падзякі і павагі да ўдзельнікаў Вялікай Айчыннай вайны, гатоўнасці да выканання грамадзянскага абавязку і канстытуцыйных абавязкаў па абароне інтарэсаў нашай краіны — Рэспублікі Беларусь, служыць папулярызацыі беларускай культуры і яе духоўных каштоўнасцей, выяўленню і падтрымцы таленавітых пачынаючых аўтараў.
У конкурсе прынялі ўдзел каля 50 маладых паэтаў ва ўзросце 14 — 30 гадоў з 12 раёнаў і гарадоў Магілёўшчыны. Найбольшую актыўнасць праявілі студэнты Магілёўскага дзяржаўнага універсітэта харчавання, Магілёўскага дзяржаўнага універсітэта імя А.А. Куляшова, навучэнцы гімназій і сярэдніх школ г. Быхава, Быхаўскага і Касцюковіцкага раёнаў, удзельнікі літаратурнага клуба «Святліца» ДУДА «ЦТДМ «Агат» г. Магілёва, народнага аматарскага аб’яднання «Літаратурная гасцёўня «Крынічка» пры Касцюковіцкай раённай бібліятэцы імя І.Г. Чыгрынава.
Конкурс праводзіўся ў трох узроставых катэгорыях па тэмах: «Веліч неўміручага подзвігу» (аб Перамозе савецкага народа ў Вялікай Айчыннай вайне), «Пакуль зямля твая жывая, і ты — жывы» (паэтычныя творы, прысвечаныя памяці паэта А.В. Пысіна, творы антываеннай тэматыкі, светапоглядныя — пра сэнс і каштоўнасць чалавечага жыцця), «Паэзіі высокае гучанне» (творы на вольную тэму).
У зборнік уключаны творы 37-мі ўдзельнікаў конкурсу. Вершы друкуюцца ў рэдакцыі старшыні Магілёўскага абласнога аддзялення ГА «Саюз пісьменнікаў Беларусі» У.У. Дуктава і галоўнага спецыяліста гэтага аддзялення А.І. Церахава. Матэрыял у зборніку размешчаны па тэмах конкурсу.
|