У Міжнародны дзень роднай мовы ў Магілёве пройдзе акцыя «Пішам дыктоўку». Гараджан запрашаюць 21 лютага далучыцца да мерапрыемства, якое ўжо не першы год ладзіцца ў абласным цэнтры, паведаміла начальнік аддзела культурна-адукацыйнай дзейнасці Палаца культуры вобласці Ала Кускова.

«Для дыктоўкі абраны ўрывак з твора Міхася Зарэцкага, чытаць яго будзе настаўніца беларускай мовы і літаратуры з першай гімназіі горада Ганна Бандарэнка», — расказала суразмоўца.

Дарэчы, мінулыя гады напісаць беларускую дыктоўку прыходзіла ў сярэднем каля 70 чалавек. Пасля ўсе работы правераць, адзнакі — ад 0 да 10 балаў — можна будзе падгледзіць на сайце ТБМ.

Удзельнікаў таксама чакае канцэрт, прысвечаны 75-годдзю з дня нараджэння Уладзіміра Мулявіна, які рыхтуюць артысты Палаца культуры вобласці.

Мерапрыемства ладзіцца сумесна з Магілёўскай гарадской арганізацыяй «Таварыства беларускай мовы імя Францішка Скарыны» і пры падтрымцы бібліятэчнага каледжа імя А.С.Пушкіна.

MyCity.by